Breaking: 32 vendors sa Banate Public Market, nagpositibo sa COVID-19

By: Aine Grace Bravo | February 18, 2021

ILOILO – 32 ka vendors sa Banate Public Market ang nagpositibo sa COVID-19 base sa nagguwa nga resulta sang RT-PCR subong nga adlaw.

Ginkumpirmar ini ni Mayor Carlos Cabangal.

Kalabanan sa mga nagpositibo ang nagabaligya sa fish section, kag may na-infect man nga nagabaligya sa ugahan.

Suno kay Cabangal, una nga may ginbatyag ang iloy sang isa sa mga fish vendors gani gin-swab kag nagguwa ang resulta kahapon nga positibo siya sa COVID-19,

Bangud sini, gin-swab kahapon ang 150 ka fish vendors kag nagguwa ang resulta subong nga adlaw, Pebrero 18, nga 32 sa ila ang positibo sa COVID-19.

Gindala na sa quarantine facility sang banwa ang mga nagpositibo; samtang naka-home quarantine ang ila pamilya.

Masobra pa 150 ka vendors ang gin-swab kaina, suno sa alkalde, kag ginalauman nga magguwa ang resulta buwas. Nagalaum si Mayor Cabangal nga indi na madugangan ang mga na-infect sang virus.

Ginsiraduhan temporaryo ang merkado publiko halin kahapon kag tubtob lang kuntani buwas. Pero nakadepende sa resulta sang RT-PCR tests sang dugang nga vendors kun i-extend ang lockdown sa merkado.

Lakip sa ginsiraduhan temporaryo ang pala-pala.

Nagahingyo sang paghangup si Mayor Cabangal sa mga apektado bangud sa pagsirado sang merkado kag pala-pala. Sa subong suno sa alkalde, prayoridad sang LGU nga masigurado nga indi maglapta ang virus. –via Firingline