Mga taga-Panay, ginapapreparar sa posible paglabay sang Bagyo Auring

By: Aine Grace Bravo | February 18, 2021

ILOILO CITY — Ginapapreparar sang PAGASA ang mga taga-Panay sa posible nga paglabay sang Bagyo Auring sa isla.

Suno kay Engr.Raffy Tapales sang PAGASA Iloilo, posible sa kaagahon sang Pebrero 21 ukon 22 magalabay sa tunga-tunga sang isla sang Panay ang bagyo base sa las-11 kaina sang aga nga tracking.

Apang ginklaro ni Tapales nga posible pa magbag-o ang direksyon sang bagyo.

Sa forecast sang PAGASA, magal-umon na ang panahon sa Panay umpisa subong nga Pebrero 18 kag magal-umon kag maulanon naman buwas.

Sa Pebrero 20, gina-forecast naman nga maulanon kag mabalod kag delikado na sa magagmay nga mga mangingisda.

Samtang sa Pebrero 21 kag 22, mangin maulanon nga may dala nga mamadlos nga hangin. –via Angel Mae Ciudad