By: Aine Grace Bravo | February 22, 2021

Iloilo City — “We are just putting it on the table for discussion so that indi lang kita kundi ang iban nga siyudad maistoryahan man ini.”

Ini ang pag-athag ni Iloilo City Mayor Jerry Treñas sa plano nga ginapatun-an niya subong sa City Legal Office nga indi pagpabalikon sa obra ang mga nagatrabaho sa siyudad kun indi sila mabakunahan.

Sa interview sang Aksyon Radyo Iloilo, makapila ka beses ginsulit sang alkalde nga gina-istoryahan pa lang ang plano, “I want to clarify nga we are talking about this for discussion purposes. Waay kita nagabutang sini para piliton ta na ang tawo nga magdesisyon [nga magpabakuna]. This is not to compel anyone to be vaccinated just because they do not agree. Wala kita naghambal sini nga ginapilit ta nga ‘kay ti indi kamo kaobra pabakuna na lang kamo’.”

Suno pa sa iya, “ang punta sini indi man siguro ako ang madesisyon, ang IATF [Inter-Agency Task Force] man ultimately ang madesisyon.”

Gin-deny man ni Treñas nga ang plano may kaangtanan sa nagguwa nga figures sa mga luyag magpabakuna kag indi magpabakuna base sa nagbalik nga consent forms nga ginpanghatag sang COVID-19 team sa mga residente sa siyudad.

Nagguwa nga 29 porsiento sang mga nahatagan sang consent forms ang handa magpabakuna kag 71 porsiento ang indi luyag magpabakuna.

Gin-athag niya nga ini santu sa pahayag sang mga eksperto pareho kay American physician-scientist kag immunologist nga si Dr. Anthony Stephen Fauci nga naghambal nga matapos lang ang pandemya kun malab-ut ang herd immunity ukon 70 tubtob 80 porsiento sang world population ang mabakunahan.

Suno pa kay Treñas, luyag niya nga istoryahan ini bangud wala siya nakahibalo kun ano ang matabu sa pandemya pananglitan nga tunga sang populasyon lang ang mabakunahan kag ang katunga wala nabakunahan.

Ginhalimbawa niya ang posible mangin sitwasyon sa mga opisina kun pila lang ka empleyado ang mabakunahan kag may mga empleyado nga wala natublukan sang COVID-19 vaccines, “Kun wala ka nabakunahan, maybe you have a separate work area and space.” —via Aksyon Hotline