Iloilo City — Masobra sa 76% sang target population sa Western Visayas para sa Supplemental Immunization Program para sa polio, tipdas, kag makayha ang nalab-ot na sang Department of Health 6.

Suno kay Dr. Daphynie Teorima, Child Health and National Immunization Program Coordinator sa DOH6, 78% na ang coverage nila para sa tipdas kag makayha samtang 76% naman ang nalab-ot para sa oral polio vaccine.

660,404 ka mga kabataan nga naga-edad 9 tubtob 59 ka bulan ang target bakunahan para sa tipdas kag makayha sa rehiyon.

770,280 naman ka mga kabataan nga tubtob 59 ka bulan ang target para sa oral polio vaccine.Nagapanguna ang probinsya sang Iloilo sa may pinakamataas nga nabakunahan nga nalab-ot na sa 87.17%.

Ginsundan sang Capiz (80.9%), Negros Occidental (79.24%), Guimaras (78.84%), Bacolod City (72.72%), Aklan (69.52%), Antique (68.33%), kag Iloilo City (65.34%) .

Indi magnubo sa 95% ang kinahanglan para malab-ot ang herd immunity sa nasambit nga mga balatian.

Ang herd immunity ang indirect nga immunity ukon proteksyon nga mahatag sa populasyon nga mabakunahan ang nagakaigo nga numero sang mga residente.

Nagalaum si Dr. Teorima nga malab-ot sang iban pa gid nga mga Local Government Units ang ila target antes magtakop ang bulan sa pagpatuman man sang ila Supplemental Immunization Program.

Nagapangduha-duha ang iban nga mga ginikanan sa pagpabakuna sa ila kabataan sa pagpati nga bakuna para sa COVID-19 ang ginahatag.

Gin-athag sang DOH6 nga bakuna ini para sa polio, tipdas, kag makayha kag kabahin na sang madugay na na-establisar nga immunization program sang gobyerno.

’22 LGUs PA LANG ANG NAKALAB-OT’

Sa bug-os nga rehiyon, 22 pa lang ka mga LGUs ang nakalab-ot sang ila target population as of February 21 nga data sang DOH6.

Masobra sa 100% sang target population ang nabakunahan sa Lemery, Dueñas, Barotac Viejo, kag Batad sa Iloilo samtang Nabas naman sa Aklan.

Masobra sa target population ang nabakunahan sa nasambit nga mga banwa bangud sang transient population kasubong sang pamilya sang mga workers nga mahimo man makapabakuna.

Ginakonsiderar man sang iban nga mga ginikanan ang kalapiton sang area sa pagpabakuna sang ila kabataan.Ang iban pa nga mga LGUs nga nakalab-ot na sang 95% nga target para sa tipdas kag makayha amo ang Tigbauan, Lambunao, kag Passi City sa Iloilo samang Candoni kag Murcia sa Negros Occidental.

Ang mga LGUs naman nga nakalab-ot man sang indi magnubo sa 95% coverage para sa polio amo ang Lemery, Dueñas, Tigbauan, Barotac Viejo, Batad, Lambunao, Dingle, Passi City, Guimbal, San Dionisio, Mina, Concepcion, Sara, Cabatuan ,kag San Enrique sa Iloilo samtang Candoni, Murcia, Sagay City, kag Cadiz City sa Negros Occidental.

Nabas naman sa Aklan kag Dumarao kag Sapian sa Capiz ang nakalab-ot man sa 95% nga coverage para sa polio.

‘MAS MATAAS NA ANG NALAB-OT’

Bisan wala pa natapos ang Supplemental Immunization Program para sa tipdas, makayha, kag polio subong nga bulan, mas mataas na ini ipaanggid sa coverage sa nakaligad nga lima ka tuig.

Sa surveillance sang DOH6, 67.06% lang sang target population ang nabakunahan sang 2015, 68.54% sang 2016, 66.32% sang 2017; 63.16% sang 2018, 69.3% sang 2019, kag 54.6% subong nga 2020. — via Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply