‘Mas prefer na lang nga mapatay sa natural death, indi lang sila magpa-vaccine [vs COVID-19]’ – Lemery Mayor Oscar Villegas sa pahayag sang pila ka mga senior citizens sa ila banwa

By: Aine Grace Bravo | February 24, 2021

LEMERY, Iloilo – Daku nga pagpanghangkat sa mga officials sang Lemery kun paano makumbinser ang mga pumuluyo ilabe na ang mga senior citizens nga magpabakuna batok sa COVID-19.

Suno kay Lemery Mayor Oscar Villegas, madamo siya sang feedback nga nabaton halin sa mga pumuluyo nga mas i-prefer na lang sang mga senior citizens nga mapatay sa natural death sang sa magpabakuna batok sa COVID-19.

“Sa akon nga napanan-aw kag nabatian sa mga senior citizens [sa Lemery] nga mas prefer na lang [nila] nga mapatay sa natural death, indi lang kuno sila magpa-vaccine [batok sa COVID-19].”

Ginpaathag man niya sa mga pumuluyo nga may assessment kag check-up pa nga himuon antes bakunahan.

Samtang, handa naman nga magbakuna si Villegas sa tiun nga mangin available na ang COVID-19 vaccine sa probinsiya para mapakita sa iya mga pumuluyo nga kinahanglan gid nga magpabakuna agud makabato sa COVID-19.

“So far ako, willing gid ako magpabakuna kay te tungod nga ginatan-aw ta nga daw wala na ini sang katapusan ang COVID[-19]. Amo na lang gid nga pamaagi [agud] para sa tanan nga tiun mabakod ang aton immune system.”