By: Aine Grace Bravo | February 26, 2021

OTON, Iloilo – Patay ang barangay tanod samtang pilason ang returning overseas Filipino nga babaye sang ginsulod kag gintiro sa sulod sang Day Care Center nga nagaserbe quarantine facility sa Barangay Mambog, las-dos kaina sang kaagahon, Pebrero 26.

Ginkilala ang napatay kay barangay tanod Noli Legada, 55-anyos nga nagabantay sa quarantine facility nga napilasan sa tangkugo.

Pilason ang ROF nga si Mylene Peronce, 27-anyos nga may igo sa liug.

Suno kay Mambog Punong Barangay Vanessa Salinas, ginsulod sang suspect nga si Melchor Amigable, 38-anyos sang Passi City nga live-in partner ni Peronce, ang Day Care Center kag gintiro una ang barangay tanod kag ginsunod ang ROF.

Nagpalagyo si Amigable, pero nadakpan sa Barangay Lambuyao, Oton.

Suno kay Amigable, “nadala lang ako sang akon emosyon” bangud nadakpan niya nga may ka-video chat nga lain nga lalaki si Mylene.

Ginpahayag ni Amigable nga naghinulsol siya sang iya ginhimo. –via Dave Bucayan