Iloilo — Nadakpan sa Barangay Lambuyao, Oton si Melchor Amegable, suspek sa pagtiro-patay sa barangay tanod nga si Noli Legada nga nagabantay sa quarantine facility sa Barangay Mambog, Oton.

Si Amegable man ang suspetsado sa pagtiro sa iya live-in partner nga si Mylene Peronce nga naka-quarantine sa amo nga facility.

Nagapabilin sa ospital si Peronce nga napilasan sa liug kag dughan.

Pagpangimon ang rason sang pagpaniro ni Amegable.Natabu ang krimen las dos kaina sang kaagahon.

Suno kay PCaptain Jason Pancha, hepe sang Oton MPS, nadakpan sa manhunt operation si Amegable nga nanglaktod sa talamnan matapos ang krimen.

Ginklaro niya nga “nadakpan” kag wala nag-surrender ang suspek bisan may una na nga impormasyon nga masungka siya.

Nasundan si Amegable sa balay sang iya abyan paagi sa barangay network suno kay Pancha.

Wala man sang resistance sa suspetsado sang gindakop siya dugang pa sang hepe.

MAY DELAY SA PAGRESPONDER SANG POLICE?

Ginpanindugan naman ni Pancha nga gilayon sila nagresponder sang nakalab-ut sa ila ang impormasyon.

Las 2:59 sang kaagahon suno sa iya natabu ang krimen kag las 3:20 nanawag sa ila ang taga-Mambog.

Sa alegasyon sang mga barangay officials, 40 minutos pa ang ginhulat antes nakaabot ang Oton police sa crime scene.

NGAA GINTIRO PATI ANG TANOD?

Sa interview sang Aksyon Radyo Iloilo kay Amegable, iya ginpahayag nga nagpalangdulom ang iya panulukan kabangdanan pati ang tanod iya natiro.

Kaina sang kaagahon, una nga ginsaka ni Amegable ang second floor sang day care center sa diin nagatenir ang tanod.

Gindu-ot niya ang pusil sa crystal nga bintana kag gintiro ang tanod nga naigo sa liug kag napatay.

“Waay ko kabalo kun ngaa nahimo ko to,” suno kay Amegable.

Ginsunod niya tiro ang iya live in partner nga yara naman nagakatulog sa idalum. Naigo sa liug kag dughan ang babaye kag padayon subong nga ginabulong sa ospital.

“Nagapamangkot gani ako kun kumusta na siya,” pahayag ni Amegable nga nagatumod sa iya live in partner.

Gin-ako sang suspetsado nga nangimon siya kabangdanan gintiro niya ang iya live in partner.

Suno kay Amegable, nadala siya sang iya emosyon bangud nakita niya ang iya live in partner halin sa guwa sang bintana nga naga-video call sa lalaki nga iya ginapatihan migo sini.

“Chatmate niya diri sa Iloilo,”suno kay Amegable ang kaistorya sang iya live in partner.

Antes sini suno sa suspek, nakita niya sa Facebook ni Peronce ang picture sang iban nga lalaki.

Kahapon gintuyo niya nga hulamon ang cellphone ni Peronce agud kuntani malantaw ang Facebook sini pero nagpamalibad.

Dugang ni Amegable, madugay na niya nahibaluan nga may iban nga migo ang iya live in partner pero iya ginpabay-an bangud luyag niya sang malinong nga kabuhi upod sa iya kabataan.

Nagprangka naman suno sa iya si Peronce nga indi na sa iya.Nagpabutyag sang kahanda si Amegable nga atubangon ang kaso batok sa iya.

Gin-ako ni Amegable nga tuman ang iya paghinulsol sa iya ginhimo.Indi naman niya madumduman kun diin niya ginbilin ang de dose nga pugakhang nga iya gingamit sa krimen.

Suno sa iya madugay na niya nga ginatago ang amo nga pusil.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply