COVID-19 vaccination rollout sa Pilipinas, ginsuguran na gamit ang Sinovac vaccine; UP-PGH Director Dr. Gerardo Legaspi, labing una sa pungsod nga nabakunahan

By: Aine Grace Bravo | March 1, 2021

METRO MANILA – Ginsuguran na ang rollout sang COVID-19 vaccines sa Pilipinas kaina sang aga, Marso 1, gamit ang Sinovac vaccines nga gindonar sang China sa pungsod.

Ginhimo ang symbolic vaccination sa UP Philippine General Hospital, Veterans Memorial Medical Center, Lung Center of the Philippines, Dr. Jose N. Rodriguez Memorial Hospital and Sanitarium ukon Tala Hospital kag PNP General Hospital sa sulod sang Camp Crame.

Labing una nga nabakunahan sa Pilipinas si Dr. Gerardo “Gap” Legaspi, director sang UP-PGH. Nag-administer sang bakuna si PGH nurse Chareluck Santos.

Magluwas kay Legaspi, nagpabakuna man sa PGH si Food and Drug Administration Director Eric Domingo nga una na nagpaandam sa mga healthcare workers nga may exposure sa COVID-19 batuk sa pagpabakuna sang Sinovac vaccine, lakip si MMDA head Benhur Abalos.

Sa Dr. Jose Rodriguez Memorial Hospital and Sanitarium sa Caloocan, una nga ginbakunahan ang chief sang ospital nga si Dr. Alfonso Victorino Famaran. Nagpabakuna man sa amo nga ospital si Testing Czar kag COVID-19 Task Force Deputy Chief Implementer Vince Dizon. –via PTV