Iloilo City — Ma-survey ang tagdumalahan sang Western Visayas Medical Center sa ila mga personnel agud mahibaluan kun sin-o ang luyag magpabakuna gamit ang Sinovac vaccine.

Ini ang ginkumpirmar ni Mr. Richard Saltin, designated spokesperson for COVID-19 concerns sang WVMC pagkatapos ginpahayag sang DOH6 nga lakip ang Western Visayas sa makabaton sang bakuna halin sa una nga batch sang Sinovac vaccines nga nag-abot sa pungsod.

Una na ginpahayag ni Dr. Mary Jane Juanico sang DOH6 nga ang mga healthcare workers sa WVMC kag Corazon Locsin Montelibano Memorial Regional Hospital ang una nga makabaton sang bakuna kun may available na nga supply sa rehiyon.

Wala pa sang impormasyon ang DOH6 kun pila ang gin-alokar nga Sinovac vaccines sa rehiyon kag kun san-o ini i-deliver.

Nag-conduct sang survey ang WVMC sa ila mga personnel sang nagligad nga bulan apang indi Sinovac vaccine sa baylo Pfizer kag AstraZeneca vaccines ang ila ginkonsiderar.

Sa amo nga survey, 899 sa 1995 ka mga personnel nga nagsabat ang pabor bakunahan gamit ang Pfizer ukon AstraZeneca vaccine.

493 naman ang indi magpabakuna, 561 ang wala pa nakadesisyon, samtang 42 ang wala nagsabat sang ginpamangkot kun mapabakuna.

Posible maglain ang figure suno kay Saltin kun Sinovac vaccine ang pagagamiton sa ila mga personnel.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply