Pagdagsa sang skipjack tuna ukon panit sa baybayon sang Tibiao, Antique, halos kada bulan – Antiqueño fisheries technologist
By: Aine Grace Bravo/Ariel Solacito | March 3, 2021
TIBIAO, Antique – Halos kada bulan nga nagadagsa sa kadagatan sang Tibiao, Antique ang “skipjack tuna” ukon panit.
Ini ang pahayag ni Mr. Flord Calawag, licensed fisheries tecnologist kag organizer sang Antique Fishing Festival kasunod nga nag-viral sa social media ang tonelada nga skipjack tuna halin sa ila lugar sang damlag lang.
Suno kay Calawag, “as a matter of fact, almost every month since COVID [-19 pandemic], naga-agi na diri ang mga isda sa Tibiao, the reason why diri sang una gin-put up ang Antique School of Fisheries. Ang Tibiao gid actually ang ‘tuna highway.’”
Ginpaathag niya nga nagalibot sa kalibutan ang mga isda kag may mga “sub-highways” kag naga-agi gid sa kadagatan sang Tibiao.
Manggaranon suno sa iya ang fishing ground sa Antique bangud manami ang kalidad sang tubig kag may madamo nga mga planktons kag magagmay nga isda nga ginalagas sang mga tuna kag mga dalagku nga isda pareho sang marlins, malasugi kag bisan ang mga whale shark, nga halos kada semana, naga-agi man sa lugar.
Ini man ang rason nga dapat proteksyunan ang dunang manggad sang probinsiya.
“3 TONELADA ANG NAKUHA NGA ISDA”
Naglab-ut sa tatlo ka tonelada sang skipjack tuna ang nakuha sang nagligad nga semana nga naga-average sang apat tubtob pito ka kilo ang kada isa.
Nahulik lang ini sang mga mangingisda sa sulod sang duha tubtob tatlo ka oras.
Sa subong suno sa iya, apat ka species sang tuna ang ila ginabantayan nga ginalakipan sang “skip jack tuna” ukon panit, “yellowfin tuna” ukon bantalaan, gurayan, kag “little tuna” ukon aloy.
Bangud sa bastante nga supply, barato suno sa iya ang kilo sa baligya-anay sang nasambit nga isda.
Gin-ako niya nga sang nagsugod ang pandemya halos wala sila nakabatiyag sang gutom bangud mapisan ang mga residente nga magpangisda rason nga ginaduso gid ang sustainable fishing.
“ANTIQUE FISHING FESTIVAL”
Sang nagligad pa nga tuig ang Antique Fishing festival nga may koordinasyon man sa Bureau of Fisheries and Aquatic Resources (BFAR).
Sa sulod sang 24 ka oras, pakadtuon sa tunga sang dagat ang mga partisipante kag kun sin-o ang may pinakadako nga makuha, amo ang kilalahon nga kampeon.
May mga categories man suno sa iya ang kumpetisyon kag may mga papremyo.
Hiwaton ini sa Mayo 1 tubtob 2 nga bukas sa tanan nga residente sa Western Visayas. – via Firingline