Iloilo — Ginkumpirmar ni Iloilo Police Provincial Office (IPPO) Director Gilbert Gorero nga ginpalukpan sang improvised explosive device (IED) ang patrol car sang mga pulis sa Brgy. Canawili, Janiuay mga las 9:30 sang aga.

Suno sa iya, nagapakadto sa Barangay Panuran ang mga personnel sang 603rd Regional Mobile Force Battalion agud kuntani magtambong sa groundbreaking ceremony sang agro-forestry support facility sa lugar sang natabo ang paglupok.

Wala sang may nasamaran sa insidente kag wala man na-damage ang salakyan sang mga pulis suno kay Gorero.

Magluwas sa naglupok nga IED, may na-recover man nga IED malapit sa lugar suno sa IPPO.

Halin pa kahapon, Marso 2, may mga pulis na nga nagkadto sa lugar agud mag-clear sa area.

Suno naman kay Janiuay Mayor Ben Margarico, nagasunod man ang iya salakyan sa mga pulis sang nagluntad ang eksplosyon.

Pero ginpahayag sang alkalde nga wala niya masyado nabatian ang paglupok bangud malayo ang ila antad.

Ginpahayag niya nga nagkadto man sa Brgy. Panuran ang iban nga Sangguniang Bayan members apang nakalabay na sila sa area antes pa ang insidente.

Wala sang ideya si Margarico kun sin-o ang sa likod sang pagpalupok sang IED.

Padayon nga gina-imbestigaran sang kapulisan ang insidente. Bangud sang insidente, ginpahibalo ni Board Member Matt Palabrica nga gin-cancel sang DENR 6 ang inauguration sang hanging bridge sa Brgy. Bagongbong, Lambunao nga natalana las 2 karon sa hapon.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply