Job hire sang Iloilo City Hall, dakup sa drug buy bust operation sa Molo

ILOILO CITY – Dakop sa drug buy bust operation kagab-i ang job hire sang Iloilo City Hall nga nagatrabaho bilang nurse sa Jubilee hall.

Ginkilala ang subject kay Remy Bragancia, 40-anyos sang Brgy. Casalsagan, Pototan, Iloilo nga nabaklan sang isa ka sachet sang suspected shabu sa balor nga P6,200.

Ginhimo ang operasyon sang station drug enforcement team sang Molo Police sa Brgy. Infante, Molo. Suno kay Major Marlyn Roquero, OIC sang Molo Police Station, nakuhaan pa gid si Bragancia sang siyam (9) ka sachets sang suspected shabu nga ginputos sa P50.00 nga papel.

Nakuha pa gid sa subject ang cellphone kag motorsiklo.

Nagpamalibad nga maghatag sang pahayag si Bragancia nga preso na sa Molo Police Station.