Pamilya ang miembro sang Bantay Dagat sa Guimaras na nasapwan patay matapos ang komosyon sa gindakup nga illegal fishers, nagapanawagan sang hustisya
Guimaras — Hustisya ang panawagan sang pamilya sang miembro sang Bantay Dagat sa Guimaras nga patay na sang nasapwan matapos ang komosyon sang may gindakup nga illegal fishers.
Pebrero 24 sang gab-i, nagpatrolya ang apat ka miembro sang Bantay Dagat kag Pebrero 27 sang nasapwan ang bangkay ni Nelson Bordon, 52-anyos sang Barangay Guiwanon, Nueva Valencia.
Base sa autopsy result, napatay bangud sa multiple stab wounds si Bordon.
Ginsaysay ni Claudio Buencochillo nga mga las-nueve sang gab-i sang Pebrero 24, nagpatrolya sila ni Bordon upod kanday Jerome Florendo kag Archie Gabales.
Mga apat ukon lima ka kilometro halin sa Malingin Island nga sakup sang Guiwanon, nakita nila ang fishing boat nga naga-trawl gani nga ila ginpalapitan pero ginbungguan sang fishing boat ang ila patrol boat.
Bangud mas daku ang fishing boat, nagkapan ang patrol boat sang Bantay Dagat gani nagsaka sanday Bordon kag Buencochillo sa pihak nga sakayan samtang nagtawag ang ila duha ka upod sa mainland agud magpangayo sang bulig.
May komosyon nga natabu tubtob nahulog si Buencochillo sa tubig samtang gindala sang fishing boat si Bordon.
Pebrero 27 sang aga, bangkay na sang nakita si Bordon.
Pito ang na-identify sang Philippine Coast Guard sa Hinigaran, Negros Occidental nga sakay sang Princess Analayna 3 nga naka-dock sa amo nga area kag ginapreparar na sang police ang kaso nga i-file.