Founder sang fraternity, gin-identify nga amo ang bangkay nga nasapwan sa katubuhan sa Dumangas

By: Aine Grace Bravo | March 5, 2021

DUMANGAS, Iloilo – Nakilala na ang bangkay sang lalaki nga nasapwan sa sa katubuhan sa Brgy. PD Monfort North, Dumangas sang Marso 2.

Suno kay PMAJ Joven Arevalo, hepe sang Dumangas MPS, gin-identify ang bangkay nga amo si Vivencio Benedict Dequilla, Jr., 63-anyos, tumandok sang Brgy. Lanas, Barotac Nuevo pero temporaryo nga nagatenir sa Brgy. Lagubang, Barotac Nuevo.

Nagpadulong sa punerarya ang pakaisa ni Dequilla nga si Luvin Dequilla, Jr. kaina sang aga, Marso 5, nga amo ang nag-identify sa bangkay paagi sa tattoo sa wala nga abaga.

Base sa pagpangusisa sang police, si Vivencio Benedict Dequilla, Jr. ang naka-agi nga maestro sa isa ka unibersidad sa siyudad sang Iloilo kag founder sang Psi Sigma Phi Philippines, Inc.

Natapos na ang pag-autopsy sa bangkay kag base sa resulta, may patal nga pilas sang pagkalampos sa ulo, malapit sa wala nga dulunggan, si Dequilla.

Ginabanta, suno kay PMAJ Arevalo, sa lima na ka adlaw nga nahal-id ang bangkay antes nasapwan sang Marso 2 sang aga.

Padayon ang imbestigasyon sang Dumangas police kun sin-o ang naghimo sang krimen kag kun sa diin ginpatay ang biktima.

Nagapanawagan naman ang mga kaupod sa fraternity ni Dequilla sang hustisya sa natabo sa ila founder. – via BBB