Numero sang mga personnel sang WVMC, WVSUMC nga luyag magpabakuna sang COVID-19 vaccine, nagnubo sang nahibaluan nga Sinovac vaccine ang pagagamiton
Iloilo City – Nagnubo ang numero sang mga personnel sang Western Visayas Medical Center kag West Visayas State University Medical Center nga luyag magpabakuna para sa COVID-19 bangud Sinovac vaccine ang pagagamiton.
Suno kay Mr. Richard Saltin, designated Spokesperson sang WVMC, as of today (Marso 7) , 504 ka mga personnel nila ang nagpahanugot nga magpabakuna gamit ang Sinovac vaccine.
Sang nagligad nga bulan, 899 sa 2,152 ka mga personnel sang WVMC ang nagpahanugot nga magpabakuna apang Pfizer ukon AstraZeneca vaccines ang pagagamiton.
Magluwas sa brand, posible diutay lang ang available information nahanungod sa Sinovac rason una ginkonsiderar ang Pfizer kag AstraZeneca vaccines.
Nagahatag sang orientation ang WVMC sa ila mga personnel agud makabaton sang insakto nga impormasyon sa importansiya sang pagpabakuna.Sa inisyal nga impormasyon halin sa Department of Health, 2,224 doses sang bakuna nag ginpa-in sa WVMC apang magadepende ang ihatag sa ospital sa numero sang mga personnel nga luyag magpabakuna.
‘NAGNUBO MAN SA WVSUMC’
Ginkumpirmar man ni Dr. Joselito Villaruz, presidente sang West Visayas State University nga nagnubo man ang numero sang mga personnel sang WVSU Medical Center nga luyag magpabakuna.
Sa 1,100 personnel sang WVSUMC, masobra sa 700 ang una nagpabutyag nga luyag magpabakuna apang sang nahibaluan nga Sinovac vaccines ang pagagamiton, indi maglampas sa 600 na lang ang nag-signify nga magpabakuna.
Magluwas sa brand, naka-epekto man ang age restrictions sa numero sang mga bakunahan sa WVSUMC.
Suno sa DOH, ginarekomenda ang Sinovac vaccine para sa 18-anyos tubtob sa 59-anyos.
Bwas, Marso 8, masugod sa pagbakuna para sa COVID-19 ang WVSUMC, WVMC, St Paul’s Hospital Iloilo, Iloilo Doctor’s Hospital, kag Corazon Locsin Montelibano Memorial Regional Hospital kag Dr. Pablo Torre Memorial Hospital sa Bacolod City.
Ang pagagamiton nga Sinovac vaccine ang kabahin sang 600,000 doses nga ginhatag sang China sa Pilipinas.
‘CUT-OFF BWAS, MARSO 8’
Ginkumpirmar naman ni Dr. Mary Jane Juanico sang DOH6 nga may tubtob lang bwas, Marso 8, ang anum ka COVID-19 referral hospitals sa pagsumiter sang ngalan sang mga personnel nila nga bakunahan gamit ang Sinovac vaccines.
Kun indi malab-ot ang numero sang luyag magpabakuna sa ginpa-in nga numero sang doses sa natungdan nga ospital, ihatag sang DOH6 ang COVID-19 vaccines sa iban nga mga ospital.
Gin-athag sang DOH6 nga indi mandatory ang pagpabakuna apang ginaduso ang lihok bangud makabulig gid agud maproteksyonan ang kaugalingon batuk sa COVID-19.
Suno sa mga eksperto, 50.4% ang efficacy (pagka-epektibo sang bakuna samtang gina-develop pa lang ini) sang Sinovac vaccines para sa mild to moderate cases apang 100% sini nga mapunggan nga mangin severe ukon maglala ang medical condition sang nabakunahan.
Wala ini una gin-recommend sang Food and Drug Administration nga gamiton sa mga healthcare workers bangud sang risgo sa ila trabaho apang gintadlong sang DOH nga mahimo ini gamiton bisan sa mga healthcare workers.
Ang mga nagatrabaho sa mga ospital ang target nga una bakunahan agud may proteksyon sa COVID-19.