Senior citizen, nadakpan kasunod sang engkwentro sa tunga sang NPA kag army sa Janiuay; Senior citizen, nag-ako nga miembro siya sang NPA apang ginpanginwala nga iya ang na-recover nga pusil kag IED materials

Janiuay, Iloilo — Arestado ang 66-anyos nga babaye pagkatapos sang engkwentro sang miembro sang New People’s Army kag Philippine Army sa Barangay Mañacabac 1:20 kaina sang kaagahon, Marso 16.

Suno kay Major Eleazar Climacosa, hepe sang Janiuay Police Station, nakuhaan si Nena Fernando alyas Ka Bing sang .45 caliber nga may duha ka mga magazines kag pito ka bala, mga Improvised Explosive Device materials, mga gadgets, kag subversive documents.

Suno kay BGen Marion Sison, commander sang 301st Infantry Brigade sang Philipline Army, nakabaton sila sang impormasyon nga may mga rebelde sa lugar rason gin-operate nila.

Preso si Fernando nga tumandok sang La Carlota City, Negros Occidental kag natalana nga pasakaan sang kaso.

’20 TUIG NA AKO SA HUBLAG’

Gin-ako ni Fernando nga miembro siya sang NPA sugod sang 2001.

Suno sa iya, nagdesisyon siya nga magsulod sa hublag bangud sang inhustisya nga naeksperyensiyahan sa iya trabaho sa Negros Occidental sadto.

Nagsaka sa bukid si Fernando kag nangin armado man apang wala nagdugay bangud sang iya balatian.

Bangud sini, mas nagtutok si Fernando sa pagpang-recruit sa mga luyag magsulod sa NPA.

Gina-organize nanday Fernando ang mga pumuluyo agud mapalab-ot sa gobyerno ang ila sentimiento.

Tapaz ang nangin area ni Fernando upod kay alyas Tisoy, 30 anyos.

Ginpahayag nagatenir sila sa barangay sang isa tubtob duha ka semana. Nanindugan si Fernando nga wala siya direkta nga nagapang-recruit apang nagapanghinun-anon sa mga pumuluyo sa nagkalain-lain nga mga isyu sa sosyodad.

‘WALA SANG ENGKWENTRO AH’

Ginpanginwala naman ni Fernando nga may engkwentro nga nagluntad kaina sang aga.

Una nga nagsulod sa balay ang mga militar tubtob nga nakabatI sila sang mga lupok sang pusil.

Ginpaguwa kanday Fernando kag ang duha ka mga tagbalay kag pagbalik nila, ginpahayag nakaplastar na ang mga nasambit nga mga recoveries.

Wala naman nakit-an sa lugar si alyas Tisoy kag ginapatihan nga nagpalagyo. Ginpanginwala man ni Fernando nga iya ang na-recover nga pusil kag IED materials.

Dugang niya, wala man siya nakakakita nga nakarga ini ni alyas Tisoy nga upod niya sa pagpang-recruit.

Ginpabutyag ni Fernando nga wala siya nakahinulsol sa pagsulod sa NPA bangud nangin maayo man ang pagtrato sa iya sa hublag. — with reports from Aljohn Torreta