8 pulis sa PRO 6, gin-dismiss
By: Aine Grace Bravo/Ariel Solacito | March 30, 2021
KAMPO DELGADO, Iloilo City – Nag-epekto na ang dismissal order batok sa walo ka pulis sa Police Regional Office 6.
Pero suno kay PRO6 Spokesperson PLTCOL Joem Malong, pwede pa maka-apelar ang mga pulis.
Lakip sa mga gin-dismiss nga nag-epekto sang Pebrero 3 ang mag-asawa nga Pat. Agnes Bagatela kag Pat. Wilnie Bagatela nga may kaso nga grave misconduct. Ini may kaangtanan sa reklamo batok sa mag-asawa sang 2016 nga ginpasaka ni Gina Huelar sang Relocation Site, San Isidro, Jaro sa isyu sang pagpangtaya sang pusil kag pagpamahog sang mag-asawa.
Enero subong nga tuig, una nga ginpahayag ni NAPOLCOM 6 Dir. Atty. Joseph Celis nga gin-dismiss sang NAPOLCOM En Banc ang mag-asawa nga Bagatela.
Pebrero 29, 2021 nag-epekto ang dismissal order batok kay PSSg Ricardo Morante Jr. sa kaso nga grave misconduct. 2017 suno kay Celis sang nagdesisyon ang NAPOLCOM sa kaso ni Morante nga gin-file ni Chris Villaruel. Nag-file si Morante sang Motion for Reconsideration pero gin-deny.
Si Morante ang isa sa mga ginkasuhan sa pagpatay sa negosyante nga si Delfin Britanico sa La Paz.
Enero 28, 2021 naman sang nag-epekto ang dismissal order batok kanday PSSg Rodel Paulan, PSSg Dinaree Sia, PSSg Alexis Jutis, kag PEMS Dante Sison sa kaso nga grave misconduct nga ginpasaka sa NAPOLCOM 6.
Miembro sila sadto sang City Anti-Illegal Drugs Enforcement Task Force. 2014 sang ginpasakaan sila sang kaso sang 16-anyos nga dalagita bangud gindala siya sa Arevalo Police Station kag ginpa-ako ni Jutis nga amo ang nagkuha sa iya nadula nga service firearm.
Nagreklamo man ang dalagita nga gintampa kag ginhampak siya samtang gina-interogar. Gindala man siya sa Jalandoni Bridge kag ginpahug apang naabtan siya sang iya amay.
Gin-dismiss man si PEMS Ritzie Ruiz sa kaso nga grave misconduct nga ginpasaka sa iya sa NAP0LCOM 6. – via Aljohn Torreta