Food Panda rider nga maa-deliver sang pagkaon sa bangko sa De Leon St., City Proper, patay sang gintiro sang guwardiya; Suspek, nagpalagyo
ILOILO CITY – Patay ang Food Panda rider nga ma-deliver sang pagkaon sa bangko sa De Leon Street, City Proper sang gintiro kahapon sang aga, Marso 31.
Gin-identify ang biktima kay Jomar Sanchez sang Bitoon, Jaro.Suno sa nagabantay sang salakyan malapit sa area nga na-interview sang Aksyon Radyo Iloilo News Team, nabatian niya nga naakig ang guwardya sang Malayan Bank sang may nabasa nga dokumento bangud gintungtungan sang gin-deliver nga pagkaon.
Nag-sorry man ang biktima suno sa nakakita pero nabatian niya na lang nga naglupok ang pusil. Nakita niya pa nga nakadalagan pa ang biktima pero ginsunod sang guwardya kag liwat nga gintiro.
Nagpalagyo ang guwardya nga gin-identify kay Argie Solis sang Grabato Investigation and Security Agency.
Base sa impormasyon, taga-Antique si Solis.
Nagapanawagan ang pamilya sang biktima nga mag-surrender na ang suspek.