Iloilo City — Patay ang 19-anyos nga lalaki matapos natiruhan kagab-i, Abril 3 sa Tagbak, Jaro.

Ginkilala ang biktima kay Carl Labuson nga taga Leganes, Iloilo, kag bata ni Leganes SB Member Larry Labuson.

Suno sa magulang sang biktima, makadto lang sa convenience store ang iya manghod upod sa ila agot nga babaye.

Ginbilin sang biktima ang iya manghod nga babaye sa convenience store agud magpatughong sang iya nga motorsiklo.

Nakibot na lang ang magulang sang gintawgan sila nga magkadto sa ospital bangud natiruhan ang iya utod.

Suno naman sa security guard nga naga-duty malapit sa area, pasado las 7 sang nakabati sila sang tatlo ka asud-asod nga lupok rason nga gintawag niya ang mga tanod nga yara man lang malapit sa lugar.

Gilayon nila nga gin-respondehan ang area kag nakit-an na lang nga duguon ang lalaki, nagakaya kag may igo sang pagkatiro sa ulo.

Wala na nagahulag ang biktima antes pa man gindala sa ospital suno sa security guard. Gindala pa sa ospital ang biktima pero wala na natabangan.

Base naman sa impormasyon sang guard, suno sa mga nakakita, antes natiruhan ang biktima, may nakabais siya nga nagasakay sa motorsiklo, naka-jacket nga green kag naka-helmet nga pula kag may angkas.

Ginpahayag sang nakakita suno sa security guard nga nag-abante pa ang biktima pero ginsunod sang suspek kag gintiro.

Gilayon naman nga nagpalagyo pakadto sa coastal road ang suspek. Wala nila makita kun sin-o sa duha ang nagtiro sa biktima. — via Brian Valle

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply