Pag-obserbar sang Semana Santa sa probinsya sang Iloilo, ‘generally peaceful’ — IPPO

ILOILO — Nangin malinong kag matawhay ang pag-obserbar sang Semana Santa sa probinsya sang Iloilo.

Ini ang nangin assessment ni Iloilo Provincial Police Office (IPPO) Director Colonel Gilbert Gorero.

Suno sa iya, wala sang “major events” nga na-record sa mga kabanwahanan bangud lain subong ang Holy Week kumparar sa mga naglilgad nga tinuig bangud sa ginapangatubang nga COVID-19 pandemic.

Nangin matawhay ang pag-obserbar sang Semana Santa bangud man sa kooperasyon sang mga Simbahan sa diin nagpatuman sila sang mga aktibidad nga nagakabagay subong nga may pandemya agud malikawan ang paglapta sang balatian, dugang pa ni Gorero.

Padayon naman ang pagpahanumdom sang IPPO sa publiko nga magsunod sa minimum health protocols kaangay sang pagsuksok sang face mask kag face shield, pag-obserbar sang physical distancing kag masami nga pagpanghugas sang kamot. — via El John Mejia