Pag-obserbar sang Semana Santa sa siyudad sang Iloilo, malinong kag matawhay — PCPT Sangrines
Iloilo City — Nangin malinong kag matawhay ang pag-obserbar sang Semana Santa sa siyudad sa pihak sang nagluntad nga duha ka separado nga shooting incidents.
Sa assessment ni Police Captain Shella Mae Sangrines, hepe sang City Proper Police Station, indi konektado sa anuman nga religious activities kag programa sang simbahan ang duha ka insidente.
Ginatumod ni Sangrines ang pagpatay sang security guard sa Foodpanda rider sa De Leon Street, City Proper sang Mierkules Santo, Marso 31 kag ang pagpatay sa bata sang SB member sang Leganes sa Tagbak, Jaro kagab-i, Abril 3.
Resulta suno sa iya sang indi pag-intiendihanay sa tunga sang mga biktima kag suspetado ang duha ka separado nga krimen.
Matalunsay ang pagdumdom sang Semana Santa bangud sang temprano nga coordination sang kapulisan sa mga simbahan may kaangtanan sa pag-implementar sang minimum health protocols ilabe na ang paglimita sa numero sang mga sumilimba kag pagdumili sang public gatherings.