Mga chartered flights para sa mga OFWs halin sa Manila pakadto sa Western Visayas, temporaryo nga gin-suspend tubtob Abril 10 — OWWA
Iloilo City – Temporaryo nga gin-suspend sang Overseas Workers Welfare Administration (OWWA) ang ila mga chartered flights para sa mga Overseas Filipino Workers (OFWs) halin sa Manila pakadto sa Western Visayas.
Sa ginpadala nga mensahe ni OWWA Administrator Hans Leo Cacdac sa Aksyon Radyo Iloilo, ginpahayag niya nga magalawig ini tubtob sa Abril 10 base man sa direktiba sang Inter Agency Task Force.
Nagpanawagan naman ang OWWA sa mga OFWs nga indi magdeklarar nga residente sang National Capital Region ukon Luzon kun Western Visayas ang pinal nga destinasyon nila.
Matandaan, nag-request si Mayor Jerry Treñas sa IATF sang temporary suspension sang flights kag trips halin sa ‘NCR Plus’ kag Cebu pakadto sa Western Visayas halin kahapon, Abril 4, tubtob sa Abril 10.
Ini agud malikawan ang pagdamo sang COVID-19 cases sa Western Visayas.Base sa Updated Omnibus Guidelines on the Implementation of Community Quarantine, ‘unhampered’ ukon indi dapat pagpunggan ang pagpapauli sang mga OFWs.
Indi ma-implementar ang amo nga guidelines kun basehan ang pinaka-ulihi nga posisyon sang IATF halin sa impormasyon ni Cacdac.