ILOILO CITY — Nagdamo ang numero sang mga nagpabutyag nga mapabakuna batok sa COVID-19 sa Iloilo City.

Pero ang problema lang suno kay Iloilo City COVID-19 team Spokesperson Jeck Conlu, amo ang proseso sa pagparehistro sa mga mapabakuna.

May nagahambal suno sa iya nga mapabakuna sila pero wala nagaparehistro bangud masaku sila sa ila trabaho.

“Subong ang gina-obra sang aton mga barangay officials, ginakadtuan na ni sila balay-balay. Una ang mga senior citizens naton nga magparehistro gid. Base sa aton [nga] pag-campaign naton, madamo na ang gusto nga magpabakuna [batok sa COVID-19]. Ang aton subong nga problema ang process sa pagpa-register sa ila.”

Malapit 400,000 ang target nga bakunahan sa siyudad kag 60,000 ang nagparehistro na nga sigurado nga magpabakuna.

Gin-extend na halin las-8 sa aga tubtob las-8 sa gab-i ang pagparehistro halin Lunes tubtob Domingo sa mga kabarangayan agud madamo ang ma-cater.

Gin-athag ni Conlu nga indi gid mapat-od kun pila ang bakunahan batok sa COVID-19 kun wala sang registration.

Gindugang pa niya nga pag-abot sang bakuna nga ginbakal sang siyudad, suguran gilayon ang vaccination rollout.

Ginhaylo man ni Conlu ang mga nagapangduha-duha nga magpabakuna nga magparehistro lang bangud posible nga magbag-o pa ang pinsar. –via Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply