Iloilo City – Luyag ipatuman sang Iloilo City Police Office pagbutang sang numero sa helmet sang mga riders sa syudad.

Isa ini sa mga lihok nga ginrekomendar ni ICPO Dir. Uldarico Garbanzos kay Councilor Carlos “Jojo” Javellana, chairman sang Committee on Police Matters sa city council, agud malikawan ang pagluntad sang mga krimen kag gilayon man ini nga masolbar pananglitan may magluntad.

Suno kay Garbanzos, sa masami, nabudlayan sila sa pag-identify sa mga motorcycle-riding suspects ukon suspetsado nga nagasakay sa motorsiklo, bangud may suksok nga bonnet kag helmet.Bangud sa COVID-19 Pandemic, nagapabudlay man sa pag-identify sa mga riders ang paggamit nila sang face mask.

May ipreparar nga database ang ICPO sang tanan nga mga riders agud mahibaluan kun ano ang numero sang natungdan nga rider.

Wala pa sang finality ang amo nga proposal kag nagadepende ini sa city council suno kay Garbanzos.

‘MAY FACIAL RECOGNITION’

Luyag man sang ICPO nga mag-install sang ‘toll gate’ sa tanan nga mga entry kag exit points sa syudad.

Kasubong ang sistema sa mga toll gates apang wala sang toll nga pagabayaran.

May CCTV camera nga pagagamiton para sa facial recognition sa driver kag para ma-capture man ang plate number sang salakyan.

Wala natul-id kun para lang ini sa driver ukon sa tanan nga mga nagabiyahe.Dugang diri, ginaduso man sang ICPO ang pag-install sang video recording sa tanan nga mga salakyan.

Mas maayo kun may video recording sa atubang kag likod sang salakyan agud makabulig sa imbestigasyon sang pulis kun may mga insidente ukon krimen.

Kinahanglan ang pagpasar sang ordinansa sang Local Government Unit kag pag-issue sang nagakaigo man nga mga polisa ukon guidelines sang natungdan nga ahensiya sang gobyerno sa pagpatuman sang amo nga programa.

‘Facial recognition sa Manila’

Marso sang nagligad nga tuig sang gin-anunsyar ni Mayor Isko Moreno nga plano sang ila LGU nga mag-install sang mga surveillance cameras nga sarang sang facial kag plate number recognition.

Mahimo man mahibaluan ang criminal record sang indibidwal sa Philippine National Police, National Bureau of Investigation, kag Philippine Drug Enforcement Agency base sa software nga ila gamiton.

‘POLICE VISIBILITY’

Samtang wala pa sang finality ang amo nga mga plano ni Garbanzos, gin-adjust na sang ICPO ang ila security measures kasunod sang duha ka mga shooting cases sa syudad sang nagligad nga semana.

Mangin masami ang pag-conduct sang spot checks sa mga border control areas sa syudad.

Ini ang magluwas pa sa gina-conduct nga checkpoints sang local police.

Mas pasangkaron man sang ICPO ang beat patrol ukon pagpatrolya sang mga pulis sa ‘areas of convergence’ kasubong sang mga malls, terminals, kag ports.

Ang mga motorcycle cops kag mobile patrol naman ang magapatrolya ilabe na kun gab-i.

Nagapanawagan man si Garbanzos sa publiko nga gilayon nga mag-report sa ila agud gilayon man nila nga marespondehan. — via Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply