Iloilo City — Handa nga magsuporta ang riding community sa Panay sa plano sang Iloilo City Police Office (ICPO) nga pagbutang sang numero sa mga helmet agud matapna ang kriminalidad sa siyudad.

Suno kay Mr. Carlo Eyao sang Panay Alliance Riding Enthusiast (PARE), base sa iya pagkonsulta sa mga kapareho niya nga motorcycle rider, wala ini sang problema kun may mag-provide man lang sang helmet kag kun wala sila sang gastuson.

Ginpahayag niya nga lehitimo sila nga mga riders kag indi mga kriminal gani nahangpan nila nga para ini sa kaayuhan sang tanan.

Sa pihak sini, may tatlo ka mga ginsuhestiyon si Eyao agud malikawan ang mga nagakatabo nga krimen sa siyudad. Una, ang pagpasangkad sang police visibility.

Dapat suno sa iya nga may naga-roving nga mga motorcyle cops sang 24-oras nga maga-focus sa mga hotspot areas sa siyudad.

Ikaduha, amo ang pagplastar sang mga surprise checkpoints sa mga entrance kag exit points.Ikatatlo, ang pagdugang ukon pagpabutang sang mga high definition CCTV cameras sa mga strategic nga lugar agud maathagan ang hitsura sang riders ukon plate numbers kun i-zoom kag dapat 24/7 ini nga gina-monitor.

May kaangtanan naman sa database sang mga motorcycle riders, ginpahayag ni Eyao nga mas maayo kun mag-tie up ang kapulisan sa LTO, munisipyo, ukon barangay para mas mahapos nga ma-track ang tag-iya sang mga motorsiklo. — via Aksyon Night Patrol

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply