BACOLOD CITY — Nag-ako na ang suspetsado sa pagpatay sa apat ka miyembro sang pamilya sa Gardenville Subdivision, Tangub, Bacolod City nga siya ang nagpatay sa mga biktima.

Ini ang pinaka-ulihi nga impormasyon halin kay PMAJ Joery Puerto, hepe sang Police Station 8 sa Bacolod City.

Una ginkabig nga “person of interest” si Christian “Don Don” Tulot, nagatrabaho bilang driver sa Don Salvador Benedicto sa Negros Occidental kag nakapangasawa sang taga-Malangabang, Concepcion, Iloilo.

Una man siya nanginwala sang kahilabtanan sa krimen sang ginpamangkot sang kapulisan matapos siya nadakpan sa Don Salvador.

Pero nag-ako siya sang ulihi nga siya ang nagpatay sa mga biktima.Upod niya sa paghimo sang krimen ang duha pa ka iban.Nasapwan sang Abril 7 sang aga nga patay ang mga biktima nga gin-identify kanday Jocelyn Espinosa-Nombre (60 anyos); Remedios Espinosa (ginabanta 65 anyos nga utod ni Jocelyn); Michael Espinosa, (ginabanta 30 anyos nga bata ni Remedios) kag Precious Espinosa (5 ka tuig nga bata ni Michael).

May mga pilas sang pagkalampos sa ulo ang mga biktima.Suno kay Puerto ginguntingan pa ang buhok ni Jocelyn.

Ginapatihan nga tatlo ka adlaw na nga patay ang mga nasapwan.Ang bana ni Jocelyn nga si Jonel Nombre ang nagatrabaho sa barko (inter-island ang biyahe).

Suno sa utod ni Jonel nga taga-Banago, Bacolod City, gintawgan siya sang iya nga utod bangud nga indi niya ma-contact si Jocelyn gani nga ginkadtuan nila sa Tangub pero patay na sang nasapwan.

Nasapwan sa sofa ang bangkay sang bata, sa kamalig naman ang bangkay ni Michael nga naputos sang habol samtang sa atubang nga parte sang balay nakit-an ang bangkay sang duha ka tigulang nga naputos man sa habol.

Gin-ako man ni Tulot, suno kay Puerto, nga nagagamit siya sang illegal drugs.Domingo sang ulihi nagkadto ang lalaki sa balay sang magpamilya.

Nagapadayon ang imbestigasyon sang mga pulis sa krimen pati na ang identity sang duha pa ka kaupdanan ni Tulot.

Ginkumpirmar naman ni Malangabang, Concepcion Punong Barangay Mario Bagaforo nga nagakadto kun kaisa sa ila si Tulot.Suno sa kapitan, paryente man nila ang napangasawa ni Tulot.

Si Tulot suno sa iya ang tumandok sang Pavia, Iloilo. Gin-ako sang kapitan nga na-intercept man si Tulot sa Dumangas port sang tiempo nga naka-ECQ pa ang Iloilo bangud nagpauli nga wala sang nagakaigo nga koordinasyon kag papeles.

Gin-quarantine suno sa iya sa Concepcion si Tulot pero makaligad ang isa ka bulan wala naman niya nakita sa barangay kag posible suno sa iya nga nagbalik ini sa Bacolod City. — via Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply