By: Aine Grace Bravo/Ariel Solacito | April 13, 2021

ILOILO – Indi lahog ang ginapangatubang nga COVID-19 pandemic sang Pilipinas.

Ini ang ginpahanumdom ni Iloilo Police Provincial Office (IPPO) Director PCOL Gilbert Gorero bangud sa padayon nga paghiwat sang pabulang sa pila ka mga kabaranggayan sa probinsiya.

Ini man ang rason nga hugot nila nga ginapatuman ang mandu ni Iloilo Governor Arthur Defensor Jr. nga dumilian ang pagtipon-tipon lakip ang pagbulang bangud ginatudlo ini nga isa sa mga rason sang paglapta sang COVID-19.

Pila ang mga nadakpan sa sunod-sunod nga operasyon batok sa pagbulang sa probinsiya sang damlag lang.

Mas maayo pa, suno kay Gorero, sa lisenyado nga cockpit arena bangud mahimo ma-regulate ang mga tawo pero sa mga improvised cockfighting arena kag tago nga pabulang, makapagusto sila bangud man wala sang regulasyon.

Gin-abi-abi man ni Gorero ang impormasyon nga ginapalab-ut sang mga residente sa mga patago nga bulang sa mga kabaranggayan.

“INDI NA KINAHANGLAN KABLITON ANG MGA BARANGAY OFFICIALS”

Ginpahayag pa ni Gorero nga indi na kinahanglan nga kabliton ang mga barangay officials kun may nagahimo sang pabulang sa ila barangay.

Suno sa iya, nagasumiter sila sang report sa DILG nga may gin-alegar nga pila ka barangay officials nga naga-tolerar sang bulang sa ila barangay.

Gin-ako man niya nga indi masarangan sang kapulisan kag mga alkalde lang gani daku gid ang mabulig sang mga barangay officials.

Wala nagapati si Gorero nga wala nakahibalo ang pila ka barangay officials nga may nagahimo sang bulang sa ila lugar.

Ginpahayag pa ni Gorero nga kun may madakpan sa barangay nga nagabulang, naga-imbestigar ang kapulisan kag ginasumiter sa DILG ang mga rason kun ngaa wala ini gina-report sang barangay. – via Firingline