Iloilo City – Naghiwat sang e-Sabong sa Iloilo Coliseum sa Jaro sang nagligad nga Abril 11.

Ini ang ginkumpirmar sang masaligan nga source sang Aksyon Radyo Iloilo sa sulod sang Iloilo Coliseum kag ni Captain Eduardo Siacon, hepe sang Jaro Police Station.

Suno kay Siacon, nagresponder sila sa lugar sang nakabaton sang impormasyon nga may ginahiwat nga bulang.

Sa pagpakig-angut sang mga pulis sa tagdumalahan sang Iloilo Coliseum, ginpakitaan sila sang permit halin sa Philippine Amusement and Gaming Corporation para sa paghiwat sang e-Sabong .

Sa Updated Omnibus Guidelines on the Implementation of Community Quarantine (with amendments as of April 3), ginapahanugutan ang bulang sa mga lugar sa idalum sang Modified General Community Quarantine apang e-Sabong ukon online cockfighting lang.

Ang PAGCOR ang mahagatag sang lisensya kag magadihon sang guidelines sa pagpatuman sini.

Sang ginpamangkot si Siacon kun paano nila na-verify ang ginpakita nga permit, ginpahayag niya nga wala sila sang pamaagi sa pag-validate sini.

Ginpasiguro naman sang mga pulis nga wala sang audience nga nakasulod sa Iloilo Coliseum, magluwas lang sa mga promoters kag handlers.

Sa impormasyon sang Aksyon Radyo Iloilo, 100 ka sultada ang ginhiwat sa Iloilo Coliseum sang Abril 11.

Tubtob naman sa 30 indibidwal ang nagkadto sa bulangan kag luyag tani nga magsulod apang wala ginpahanugutan sang mga pulis.

Wala pa nakahatag sang pahayag ang tagdumalahan sang Iloilo Coliseum angut sini.

‘PAGCOR HAS YET TO ISSUE THE IRG’

Sa pagpakig-angut sang Aksyon Radyo Iloilo sa PAGCOR, ginpahayag nila nga ma-issue pa lang sila sang Implementing Rules and Guidelines sa online cockfighting ukon e-Sabong.

Ini ang pagalakipan sang guidelines sa licensing tubtob sa pag-operate sang e-Sabong.

Sang ginpamangkot liwat sang Aksyon Radyo Iloilo kun may na-issue na sila nga permit para sa e-Sabong sa Iloilo Coliseum, wala na nakasabat ang representante sang PAGCOR.

Ginkadtuan man sang Aksyon Radyo Iloilo ang satellite office sang PAGCOR sa City Proper apang gin-refer nila sa central office ang paghatag sang official statement.

Ginpahanugutan sadto ang pagbulang sa mga lugar nga sa idalum sang MGCQ apang may mga limitasyon kasubong sang no live audience kag no remote betting.

Gin-suspend ang pag-operate sang bulangan sang Marso, 2021 pagkatapos nagdamo ang kaso sang COVID-19 apang ginpahanugutan liwat ini sang IATF base sa pinaka-ulihi nga Omnibus Guidelines. — via Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply