By: Aine Grace Bravo | April 16, 2021

ILOILO – Ginapanan-aw sang Provincial Veterinary Office sang Iloilo Provincial Government nga magalawig pa sang duha tubtob tatlo ka tuig antes makabawi ang swine industry sa epekto sang African Swine Fever.

Suno kay Dr. Darel Tabuada, daku ang epekto sang ASF sa hog industry sa Luzon gani nga nagapangita sila sang supply sa mga rehiyon nga wala pa nasudlan sang balatian, pareho sa Western Visayas.

Ginpahayag ni Tabuada nga oportunidad na ini agud nga makabawi ang mga negosyante sang baboy sa Iloilo nga naga-supply sa subong sa Manila. Pero dapat nga maghalong man agud indi masudlan sang ASF ang Iloilo.

Ginatinguhaan sang Provincial Government nga makahimo sang paagi agud ma-stabilize ang presyuhanay sang baboy bangud sa pagsulod sang mga kumprador halin sa Manila.

Sa monitoring sang Provincial Veterinary Office, masobra pa 400,000 ka baboy sa probinsya –84% ang halin sa backyard kag 16% sa commercial. Kun basehan ang stocks sa backyard, nagakaigo pa suno kay Tabuada ang supply sa probinsya.

Halin Enero tubtob Abril subong nga tuig, ginabanta sa 35,000 ka baboy na ang napadala sa Manila suno kay Dr. Tabuada. – via Firingline, April 15, 2021