By: Aine Grace Bravo | April 20, 2021

MIAG-AO, Iloilo – Ginkakibot sang mga Miagaoanons ang gulpi nga pagkapatay ni Vice Mayor Leonardo Naldoza.

Ginkumpirmar ni Miag-ao Mayor Macario Napulan nga napatay si Vice Mayor Naldoza, mga la-una kahapon sang hapon, Abril 19.

Suno kay Napulan, tatlo ka adlaw ang nagligad, nagreklamo si Naldoza nga nagasakit ang iya tiyan kag sang ginpa-examine natukiban ang problema sa iya atay. May nag-develop pa gid suno sa alkalde nga kumplikasyon.

Duha ka semana na nga na-admit sa ospital si Naldoza kag sa ospital man siya napatay.

Ini na ang ikatatlo nga termino bilang vice mayor ni Naldoza kag nakaserbe man siya nga Sangguniang Bayan member sang Miag-ao.

Nagpangabay sang pangamuyo ang alkalde para kay Vice Mayor Naldoza kag nagpalab-ut man siya sang pagpakig-unong sa pamilya sang bise alkalde. – via Francisco “Iko” Elbanbuena