Iloilo City (UPDATE) – Ginpahug kag gintuyo pa bun-on ang Health and Sanitation Officer sang Iloilo Fishing Port Complex nga ginpatay sang riding-in-tandem antes nagluntad ang krimen.

Ini ang ginkumpirmar ni James Peremne, bata sang biktima nga si Glen Peremne sa iya Facebook post.

Suno kay James, nakasuay sang iya amay ang iya upod sa trabaho nga head sang security sa IFPC.

Ginpahug pa sang head sang security ang biktima kag ginhambalan nga ‘P100,000 ka lang’.

Sang nagligad nga Miyerkules, Abril 21, ginlagas man ang biktima sang lalaki nga may bitbit nga kutsilyo apang nakapalagyo siya.

Sa pagkahibalo ni James, nagsuay ang iya amay kag ang head sang security agency sa IFPC bangud wala ginpahayag wala ginpahanugutan sang biktima nga maka-dock sa IFPC ang 15 ka mga Cebuano bangud wala nagpakita sang ila travel documents kag iban pa nga mga requirements.

Nakapanugid man ang biktima sa iya asawa sa pamahug nga iya nabaton kag nagpabutyag nga handa siya nga mapatay sa pagpakigbato sa iya mga prinsipyo.

Bisan bag-o lang sa amo nga trabaho sa IFPC ang biktima, nakahibalo siya sa mga ‘illegal transactions’ sa sulod sini kag nagtuyo man nga mag-report.Nagasinggitan ang pamilya nga mahatagan sang hustisya ang pagpatay sa biktima.

Wala pa nakahatag sang pahayag ang tagdumalahan sang IFPC angut sini.Ginatinguhaan man sang Aksyon Radyo Iloilo nga makuhaan sang pahayag ang personnel sang IFPC nga nalawagan sang bata sang biktima. — via Aksyon Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply