Head sang Health and Sanitation Team sa Iloilo Fish Port Complex ng ginpatay sang riding-in-tandem, empleyado sang fish port kag indi sang Iloilo City Government
ILOILO CITY – Gin-athag ni Dr. Justo Anaquita, spokesperson sang Iloilo Fish Port Complex, nga tinawo nila si Mr. Glen Peremne, ang team leader sang Health and Safety officers sa Fishing Port nga napatay matapos gintiro sang riding-in-tandem sang Abril 23 sang gab-i.
Pagtadlong ini ni Dr. Anaquita matapos una nagguwa ang impormasyon nga job hire sang Iloilo City Government ang biktima.
Suno kay Anaquita, isa si Peremne sa lima ka gin-hire nila agud magpatuman sang mga health protocols sa sulod sang Fish Port Complex.
Deputized lang si Peremne sang City Government agud mag-isyu sang citation tickets sa mga violators sang health protocols kag ang ginabayad sa multa ang ginadiretso sa syudad.
‘MAY NAKASUAY’
Ginkumpirmar ni Dr. Anaquita nga may nakasuay si Peremne nga duha ka gwardya sa Fish Port Complex sang damlag lang.
Kasunod ini sang ‘pagkadakop’ ni Peremne sa 15 ka Cebuano nga tripulante nga nakasulod sa fishing port bisan wala sang IDs kag iban pa nga dokumento.
Gin-report ni Peremne ang natabo sa Fish Port management gani nga gindala ang mga tripulante sa quarantine facility kag gin-swab.
Maayo lang suno kay Anaquita nga negatibo ang resulta sang ila RT-PCR test.Bangud sa natabo, ginsuspender ang duha ka gwardya kag wala pa nakabalik sa pag-duty tubtob subong.
Ang duha ka gwardya ang personnel sang Manila-based agency nga ginkontrata sang Fish Port Complex.
Ginpabutyag ni Anaquita nga may overlapping sa functions sang grupo ni Peremne kag mga gwardya bangud nagabuligay sila sa pagpatuman sang mga protocols sa fishing port.
‘SIGE ANG POLICE INVESTIGATION’
Nakakuha na ang Molo police sang kopya sang mga CCTV footage sa Fish Port Complex.
Suno kay Dr. Anaquita, nagpasalig si PMAJ Marlyn Roquero, hepe sang Molo Police Station, nga indi sila mag-usik sang tiempo kag tutukan nila ang imbestigasyon.
Una na ginpabutyag ni Roquero nga may tatlo ka persons of interest sila sa krimen. Naka-coordinate na sa police ang duha sa tatlo kag lunsay sila nanginwala sang kahilabtanan sa natabo kay Peremne. – via Aksyon Hotline