Posters nga ‘naga-red tag’ sa 8 aktibista lakip ang 2 organizers sang community pantry, naglapta sa Iloilo City

ILOILO CITY (April 27, 2021) –Naglapta sa mga overpass sa syudad sang Iloilo ang mga posters nga ‘naga-redtag’ sa walo ka mga aktibista, lakip ang duha ka mga organizers sang community pantry.

Suno kay Mr. Bryan Bosque, Deputy Spokesperson sang BAYAN-Panay, una nga nakit-an sang Biernes, Abril 23, ang mga posters sa mga overpass sa General Luna kag Iznart Streets sa City Proper, kag Luna Street sa Lapaz.

Nabutang sa poster ang litrato sang mga aktibista kag nakasulat nga mga miembro sila sang Communist Party of the Philippines – New People’s Army kag kwalipikado sa pag-avail sang programa para sa mga rebelde nga naga-surrender sa gobyerno.

Ginpahayag si Bosque nga nagakahangawa sila sa ila seguridad bangud sa “pag-redtag” sa ila.

Makapila ka beses na nga ginpanginwala ni Bosque nga may kaangtanan siya sa CPP-NPA. Nanindugan man siya nga lehitimo ang ila mga organisasyon.

Nagapati si Bosque nga ang mga pulis, Armed Forces of the Philippines kag National Task Force to End Local Communist Armed Conflict ang yara sa likod sa pagtakod sang mga posters.

Naglapta ang mga posters kadungan sa pag-deploy sang Community Support Program Teams sa pito ka mga barangay sa syudad sang Abril 23.

Ginpanginwala naman ni Major Cenon Pancito, spokesperson sang 3rd Infantry Division sang Philippine Army, nga ang mga soldado ang nagpangtakod sang mga posters.

Ginhangkat ni Pancito si Bosque nga magpresentar sang iya mga ebidensiya sa iya akusasyon.

Wala pa nakahatag sang pahayag ang Iloilo City Police Office angut diri.