Iloilo — Natalana sa Biernes, Abril 30 ang public hearing sang Committee on Police Matters sang city council nga ginapamunuan ni Councilor Carlos Javellana may kaangtanan sa proposals ni Iloilo City Police Office (ICPO) Director Uldarico Garbanzos nga “Guya ko, Ipakita ko” kag Clean Rider Sticker ukon pagbutang sang sticker sa helmet sang mga motorcycle riders.

Katuyuan sang proposals nga malikawan ang riding-in-tandem cases sa siyudad.

Imbitado sa hearing suno kay Javellana si Garbanzos, taga-Land Transportation Office, city DILG, City Legal Office kag grupo sang mga motorcycle riders.

Ginpahayag sang konsehal nga madamo siya sang mga pamangkot may kaangtanan sa proposal nga butangan sang sticker ang helmet.

Lakip na diri ang mangin hitsura sang sticker, sin-o ang magasto sa sticker kag ano ang matabo sa mga naga-motorsiklo nga taga-probinsya sang Iloilo kag Guimaras nga malaka lang nagasulod sa siyudad.

Kun si Javellana ang masunod, luyag niya nga indi makaperwisyo sa mga motorcycle riders ang amo nga proposal ilabe nga subong nga pandemya. — via BBB

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply