Sta. Barbara, Iloilo – Nagsumiter sang ‘peke’ nga negative RT PCR test result ang apat ka miembro sang pamilya lakip ang ila driver nga naghalin sa Cebu.

Suno kay Atty. Leo Superio, municipal administrator sang LGU Sta Barbara, Abril 24 sang nag-abot sa Pavia ang mga natungdan via Estancia port.

Nagduda ang naga-check sang mga dokumento sa Estancia port sa ginsumiter nga RT PCR test result sang mag-asawa, ila duha ka kabataan, kag driver bangud wala sang QR code.

Sa pag-check sang LGU Sta Barbara sa Vicente Sotto Memorial Medical Center nga amo ang ginpahayag nag-issue sang negative RT PCR test result, ginpanginwala nila nga nagpa-swab sa ila health facility ang mga natungdan kag sila ang nag-issue sang negative RT PCR test result.

Sa impormasyon sang Aksyon Radyo Iloilo, naga-home quarantine ang mga returning residents apang nagmandu si Atty. Superio nga ipaidalum sila sa facility quarantine sang 14 ka adlaw. Mahimo man sila magpa-swab.

Ginpahayag naman ni Sta Barbara Mayor Reme Somo nga ginakonsiderar nila ang pagpasaka sang kaso batuk sa mga natungdan.

Antes magpauli ang mga returning residents, Overseas Filipino Workers, ukon Authorized Persons Outside of Residence, kinahanglan nga magsumiter sila sang negative RT PCR test result.Ginatinguhaan sang Aksyon Radyo Iloilo nga makuhaan sang pahayag ang mga natungdan apang nagpamalibad sila sa paghatag. — via Aksyon Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply