ILOILO CITY – Napatay matapos nga na-cardiac arrest kagab-i, Abril 29, si Jail Senior Supt. Gilbert Peremne, spokesperson kag Deputy Director for Administration sang Bureau of Jail Management and Penology 6.

Ginkumpirmar ini ni PCpl Rara Peremne, bata sang BJMP official.

Suno sa PCpl Peremne, pasado las-10 sang nagsakit ang dughan sang iya amay gani nga gindala sa Metro Iloilo Hospital and Medical Center, Inc. pero wala gid natabangan.

Nagpamalibad na nga maghatag sang recorded interview ang bata nga Peremne, pero iya ginpabutyag nga indi mabaton sang iya amay ang natabu sa iya manghod nga si Glen Peremne, ang team leader sang Health and Sanitation officers sa Iloilo Fish Port Complex, nga gintiro patay sang riding-in-tandem sang Abril 23 lang sang gab-i. – via Dave Bucayan