Roxas City — Gintukod ang Special Investigation Task Group agud magtutok sa imbestigasyon sa pagpatay sa administrador sang Pilar, Capiz.

Suno kay Police Master Sergeant Ramil Arcangeles, Spokesperson sang Roxas City Police Office, ang Capiz Police Provincial Office ang magapanguna sa SITG.

Nagatrabaho sa Pilar, Capiz ang biktima nga si John Heredia apang sa Lawaan, Roxas City natabo ang krimen kahapon, Mayo 2.

Base sa PNP Manual of Operations, ginatukod ang SITG ang magapanguna kag maga-coordinate sa pag-imbestigar kag pag-prosecute sa mga suspect sang heinous ukon sensational cases.

Ang Regional Director ang maga-issue sang order sa pag-organize sang SITG nga pangunana sang territorial chief, commander, ukon head sang unit ukon sang city ukon provincial director.

Pasakay na kuntani ang biktima sa iya salakyan sang hinali lang gintiro sang angkas sang motorsiklo nga gilayon naman nga nagpalagyo.

Sa inisyal nga impormasyon, may pilas sa ulo, tangkugo, kag kilid ang biktima.

Gina-imbestigaran sang pulis kun may kaangtanan sa anay trabaho sang biktima bilang broadcast journalist ang paghimo sang krimen.

Nangin chairman sang National Union of Journalist of the Philippines-Capiz Chapter si Heredia kag nangin miembro man sang NUJP board of directors. — via Aksyon Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply