ESTANCIA, Iloilo – Ginpaidalom sa RT-PCR test ang 20 ka mga personnel sang Estancia Municipal Police Station kasunod sang pagpositibo sa COVID-19 sang isa ka personnel.

Ginkumpirmar ni Police Major Aldrin Lamera, hepe sang Estancia MPS, nga ginpaidalom sila sa RT-PCR test kaina sang aga, Mayo 4, kag ginalauman nga magguwa ang resulta subong nga adlaw, Mayo 5.

Suno kay Lamera, sang Lunes, Abril 26, nag-duty ang isa ka personnel kag sa amo man nga adlaw, ginpahibalo ang personnel nga nagpositibo sa COVID-19 ang iya asawa.

Gilayon nga ginpapuli ang personnel kag gin-quarantine naman ang mga kaupdanan niya nga mga police nga naka-duty sa police station.

Sang Huwebes, Abril 29, ginpaidalom sa RT-PCR test ang nasambit nga personnel kag nagguwa ang resulta nga infected man siya sang COVID-19.

Ini ang rason suno kay Lamera nga gin-test man ang 20 ka mga personnel sang Estancia MPS. Bangud sini, gin-lockdown ang estayonan.

May augmentation naman halin sa 2nd Iloilo Provincial Mobile Force Company, nga amo ang maga-responder sa emerhensiya kag pananglitan may magluntad nga krimen sa Estancia.

Katuyuan sang lockdown, suno sa iya, nga mapunggan ang paglapta sang virus. —via PM Reports

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply