Ginpasaka sang 2010 ang kaso nga dishonesty kag less grave misconduct batuk kay former PRO 6 Crime Laboratory chief PLTCOL Enrique Ancheta nga gin-dismiss sa serbisyo sang damlag lang.

Ini suno sa confidential source kag sa pagpanalawsaw sang Aksyon Radyo Iloilo.

Una nga gin-relieve si Ancheta pakadto sa PNP Central Office sang Enero 20 subong nga tuig pagkatapos nagpa-interview sa mga katapo sang media sa resulta sang paraffin test sa siyam ka napatay sa kontrobersiyal nga joint operation sang mga pulis kag military sa Tapaz, Capiz sang Disyembre 30,2020.

Ginpangayuan sang paathag si Ancheta sang Police Regional Office 6 kag sang PNP Central Office angut sini.

Wala pa naghatag sang pahayag si Ancheta angut sa pag-dismiss sa iya sa serbisyo.

Suno kay PRO 6 spokexperson PLTCOL Joem Malong, gin-issue sang Abril 28, 2021 ang dismissal order kay Ancheta kag gilayon man ini nga gin-implementar.

Marso 20, 2021 sang gin-docket ini sa Office of the President kag ginaprubahan man ang pag-dismiss kay Ancheta sa kaso nga dishonesty kag less grave misconduct. Wala sang impormasyon si Malong sa dugang nga detalye sa kaso nga ginpasaka kay Ancheta nga gintunaan sang iya dismissal order. —via Aljohn Torreta