DUMANGAS, Iloilo – “Definitely wala sang may matabo nga pagbunggu-anay between the Golez and the Biron.”

Ini ang ginpahayag ni Dumangas Mayor Ronaldo Golez kasunod sang pagsaylo sang voter registration sa ila banwa ni 4th District of Iloilo Congressman Braeden John Biron.

Suno kay Golez, na-istoryahan na nila ni anay Congressman Ferj Biron ang pagsaylo sa Dumangas sang bataon nga Biron kag wala na siya namag-uhan.

“Posible man nga may mga plano man dira para kay Toto BJ (Congressman Biron) kay kun magpadalagan ini siya sa gihapon bilang incumbent nga Congressman, ang banwa ka Dumangas, sakop sa gihapon. Kun provincial, pwede man.

Kag pwede man gihapon nga ma-consider nga sa local –sa banwa ka Dumangas,” dugang ni Golez.

“Damo gahambal nga mabunggu-anay gid kami [sa eleksyon] kun matabo pero diri sa amon—sa banwa sang Dumangas, gina-istoryahan gid ina diri sang tanan-tanan mo—ginapaagi sa consultation. Amo na ang proseso permi ni [former] Congressman Ferj Biron nga gina-istoryahan and then whatever decision sang mayoriya kag sang mataas namon nga mga leadership, gina-updan ina namon. We will stand as one,” suno sa alkalde.

Wala pa malab-utan ang plano nga pagpadalagan sang bataon nga Biron sa banwa sang Dumangas bangud padayon pa ini nga gina-istoryahan.

Pero kun magdesisyon gid man suno kay Golez nga mapadalagan sa ila banwa si Congressman Biron, ginpahayag niya “Kag kun malab-utan gid man nga ang desisyon sa local, te indi gihapon matabo ang pagbunggu-anay. Gina-respeto naton ang desisyon sang mayoriya.”

Willing gid siya suno sa iya nga magpaiway kag indi kinahanglan nga magbinunggu-anay. Ginpahayag pa ni Golez nga may options man ang mga Biron nga magsaylo sang ila residency ilabe pa nga may propiedad sila sa Dumangas. — via Aksyon Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply