ILOILO CITY – Malibot ang duha ka teams sang Public Safety and Transportation Management Office (PSTMO) sa mga lugar nga may mga barkers agud paandaman kag paathagan sa nalapas nila nga ordinansa sang siyudad sugod subong, Mayo 11.

Ini ang ginpasalig ni PSTMO Head Jeck Conlu kasunod sang reklamo sang mga drivers batok sa mga barkers. Pila sa sa mga drivers, nagreklamo man nga ginapahog sila sang mga barkers, suno kay ICLAJODA President Raymundo “Boyet” Parcon.

Suno kay Conlu, ma-operate sila upod ang kapulisan batok sa mga barkers kun maubos na sila paathagan kag paandaman.

“Sugod bwas [Mayo 11], libuton ni liwat sang duha naton ka patrols kag ubuson ni sila ka-inform kag after sina, ma-operate na kita upod ang aton nga PNP,” pahayag ni Conlu.

Gin-ako niya nga natumod na nila ang mga lugar nga ginaplastaran sang mga barkers magluwas lang kun may nadugang.

Ma-coordinate man sila sa assosasyon sang mga drivers para sa amo nga aksyon agud madasig nga matultolan ang iban pa nga ginapwestuhan sang mga barkers.

Ginpaathag ni Conlu nga base sa Anti-Barker Ordinance, ang mga madakpan nga naga-barker makabig nga criminally liable kag pwede dakpon kag presuhon.

Kun mapatud-an nga guilty, mahimo sila nga mapreso sang indi magnubo sa tatlo ka bulan kag indi maglapaw sa anum ka bulan. –with news reports from PNA

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply