Pagtaas sang kaso sang COVID-19 sa Iloilo City, ginka-alarma ni Mayor Jerry Treñas
ILOILO CITY – Ginka-alarma ni Iloilo City Mayor Jerry Treñas ang pagtaas liwat sang kaso sang COVID-19 sa Iloilo City bangud nagalapta na sa pamalay kag workplaces.
Ini ang ginpabutiyag sang alkalde sa iya Facebook post. Base sa data sang Department of Health 6, nagpangatlo ang siyudad sa Western Visayas nga may pinakamadamo nga kaso sang COVID-19.
Bangud sini, magalibot na suno sa alkalde ang mga compliance officers kag kapulisan sa mga kompaniya kag mga barangay agud mag-issue sang citation tickets agud masiguro nga ginasunod ang minimum health protocols.
Sang Mayo 8, 51 ka kaso ang na-record sa siyudad kag 22 ka kaso naman sang Mayo 9.
Sa kabug-usan, 227 ka kaso na ang na-record sa siyudad halin sang Mayo 1 tubtob Mayo 9.Padayon ang panawagan sang city government nga magsunod gid sa minimum health protocols. –via Mayor Jerry Treñas FB page, with reports from DOH 6, Iloilo City COVID-19 Emergency Operations Center