Iloilo City — Plano ni Councilor Ely Estante nga istoryahon ang city DILG Director Oscar Lim may kaangtanan sa kun ano ang dapat sundon nga laye sa mga wala nagasuksok sang face mask ukon indi ensakto ang pagsuksok sang face mask.

Kasunod ini sang pahayag ni DILG 6 legal officer Atty. Cedric Jaranilla nga mahimo nga i-revoke sang LGU ang ordinansa sa minimum health standards agud malikawan ang konflikto sa lain-lain nga penalidad nga nasaad sa sa ordinansa kag sa Revised Implementing Rules and Regulations sang Republic Act Number 11332 ukon Mandatory Reporting of Notifiable Diseases and Health Events of Public Health Concern Act.

Suno sa konsehal, luyag niya iplastar sa city DILG director ang mga nagakabagay santu sa national law kag sa ordinansa sang siyudad.

Una na ginpahayag ni Atty. Jaranilla nga mahimo pasakaan sang non-cooperation ang mga wala nagasunod sa minimum health standards kag magmulta ang violator sang indi magnubo sa P20,000 apang indi magsobra sa P50,000 ukon pagkapreso sang indi magnubo sa isa ka bulan apang indi maglampas sa anum ka bulan ukon magmulta kag mapreso depende sa korte.

Ginpahayag ni Estante nga makabig na nga makahas ang pagpamulta sang P20,000 tubtob P50,000 ang mga wala nagasuksok sang face mask bangud indi man criminal offense ang amo nga violation.

“Te karon mag-criminal offense ina, may record ka sa korte, may record ka na sa NBI. Mabudlayan ka na ya mag-secure sang mga papeles mo if ever nga gusto mo mag-trabaho, gusto mo magpanglugayawan,” ang pahayag sang konsehal.

Mangita man sang paagi si Estante nga i-amend ang face mask ordinance kag i-exempt ang mga nagabisikleta, may prescription sang doktor kag mga naga-exercise. — via Aksyon Hotline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply