Iloilo City –Tubtob sa 350 bikers ang nagpasakop sa bike race sa syudad kag probinsya sang Iloilo sang Mayo 9 kag lakip sa mga organizers sang aktibidad ang chief sang Cabatuan District Hospital nga si Dr. Francisco Ronnel Quinon.

Sa Facebook postings natuhoy sa 11th Tour de Quinon 3 Man Team Race, nag-umpisa ang ila ruta sa Plazuela sa Mandurriao pakadto sa Ungka flyover, Barangay Lanit sa Jaro, Leganes, Zarraga, Pototan, Passi City, Calinog, Lambunao, Janiuay, Cabatuan, Sta. Barbara kag sa Pavia ang finish line.

P2,000 ang registration para sa team samtang P700 naman ang kada indibidwal nga luyag magpasakop.

Makita naman ang ambulansiya sang Cabatuan District Hospital nga nagasunod sa mga bikers nga kadamu-an ang wala nagasunod sa physical distancing.

Nag-post ang Cabatuan District Hospital sa ila Facebook page natuhoy sini apang gin-delete na as of 1:00 P.M. subong nga adlaw, Mayo 12.

‘PASENSYA’

Nagpangayo sang pasaylo si Dr. Quinon bangud wala nasunod ang physical distancing sa ila aktibidad.Suno sa iya, wala sila naglaum nga dugukan sang mga pumuluyo ang bike race.

Sang ginpalab-ot naman nga wala man na-observe ang physical distancing bisan sa mga bikers base sa ginpadala nga mga pictures, nagsabat siya wala nagagiyo ang pictures kag mahimo man maglain ang distansiya sa sulod lang sang pila ka mga segundos.

Nanindugan man si Dr. Quinon nga nag-coordinate sila sa natungdan nga mga LGUs kag may mga permit man sa paghiwat sang aktibidad.

Wala nadayun sang 2020 ang tuigan nga Tour de Quinon bangud sang COVID-19 Pandemic apang ginduso subong nga tuig.

Suno kay Dr. Quinon, gina-promote nila ang natural immunity kag ikaayong lawas paagi sa biking.Makabulig man ini suno indi lang sa mga bikers sa baylo pati sa bike industry.

Ginkumpirmar naman ni Dr. Quinon nga gin-issuehan siya sang citation ticket sang pulis sa Pavia sa paglapas sa physical distancing.

NGA-A GINGAMIT ANG AMBULANSIYA SANG OSPITAL SA PRIBADO NGA AKTIBIDAD?

Nagsabat man si Dr. Quinon sa paggamit sang isa sa duha ka mga ambulansiya sang Cabatuan District Hospital sa Tour de Quinon.

Ginpa-standby niya kag ginpa-convoy ang ambulansiya sang gobyerno agud magresponde pananglitan may kinahanglan sang medical intervention.

Suno kay Dr. Quinon, wala sang pili ang dapat respondihan sang ambulansiya sa pribado ukon pampubliko man nga sector.

Malaw-ay man suno kay Dr. Quinon nga sa iban pa siya nga ospital magpangayo sang assistance.

Ini ang naka-andan na sang mga organizers sang nasambit nga bike race kag wala man ginpangayuan pahanugot sa Provincial Hospital Management Office. Ang PHMO ang nagadumala sa mga district hospitals sa probinsya

.‘GINA-DISCOURAGE ANG MASS GATHERING’‘

Gina-discourage sang Regional Inter Agency Task Force ang paghiwat sang mass gatherings nga pasakupan sang mga residente halin sa iban nga mga Local Government Units.

Sa advisory sang RIATF nga ginpirmahan ni DILG6 Dir. Juan Jovian Injeniero sang Mayo 7, ginpahayag niya nga madamo sang mga requests ang mga Local Government Units sa paghiwat sang mga aktibidad nga pasakupan sang mga residente halin sa nagkalain lain nga mga lugar.

May local autonomy ang mga LGUs suno sa RIATF apang posible mangin ‘cause of concern’ ang paghiwat sang mga aktibidad bangud sang COVID-19 pandemic.

Ginpahanumdom sang RIATF nga mahimo pasakaan sang kaso ang mga Local Chief Executives ukon local officials kun mapaslawan sa pag-prosecute sa mga naglapas sa IATF Omnibus

Guidelines kasubong sang minimum public health standards.

‘WALA KAMI NAKAHIBALO, WALA MAN NILA KAMO GINPAHIBALO’

Nagdepensa man si Dr. Quinon nga wala sila nga mga organizers nakahibalo sang advisory sang RIATF angut sa mass ukon public gathering.

Ginpahayag man ni Dr. Quinon nga wala man sila napahibalo sang LGU ukon sang bisan ano nga ahenisya angut sini. Kun nakahibalo sila, kuntani wala na nila gindayon ang aktibidad. — with reports from Aksyon Aljohn Torreta

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply