ILOILO CITY – Kumpyansa ang isa sa mga mentors ni Miss Universe Philippines Rabiya Mateo nga makuha sang Ilongga beauty queen ang ikalima nga korona sang Pilipinas sa Miss Universe pageant.

Suno kay Mr. Kevin Piamonte, “Si Rabiya maalam na gid siya ya. She’s a complete package – ang ginahambal bala naton nga beauty and brains.”

Ginsaysay ni Piamonte nga una nakuha ni Rabiya ang iya atensyon antes ang Miss Iloilo—ang labing una nga beauty pageant nga gin-intrahan ni Rabiya kag siya ang ginkoronahan. Kasunod sini, gintiglawas ni Rabiya ang Iloilo City sa Miss Universe Philippines kag siya man ang nagdaug.

“Ang strategy ni Rabiya, gina-studiohan niya anay ang tanan [mga kontra] kag madasig nga mag-adjust,” dugang ni Piamonte.

Padayon man ang paglaygay ni Piamonte kay Rabiya may kaangtanan sa iya mga bashers, “Indi ka lang magpa-apekto kay may amo gid na ya [bashers]. Intindihon mo na lang kag lantawon sa lain nga perspektibo…basta may naga-bash gani sa imo, meaning to say may tindog ka…meaning to say salapakon ka. Kun wala sila labot sa imo [kag] wala ka pulos nga tawo, indi sila magsapak sa imo. Ara ka sa radar sang tanan eh.”

Gin-ako man ni Piamonte nga gilayon nagtawag sa iya si Rabiya kag naghibi matapos ang national costume show kaina, “Antes siya nagtulog, nanawag siya anay kag naghibi nga naghibi nga naghibi. Ti hibi ah. Hambal namon ihibi na tanan, maayo na nga maggululuwa na tanan. And then ginhambalan siya namon nga mag-focus na lang.”

Wala napunggan ni Rabiya nga maghibi sa iya malip-ut nga live video sa Instagram pagkatapos sang national costume show sang 69th Miss Universe.

Sa iya mensahe, nag-sorry si Rabiya kun may mga na-disappoint sa iya performance.

Ginpahayag ni Piamonte, “Ang problema to tama ka daku sang costume kag tama ka daku ang headdress. Hambal ko ‘Rabs, ang importante wala mo ginpilit ang lawas mo kay kun ginpilit mo lawas mo [kag] nadusmo ka to karon sa stage kag natumba ka to karon sa stage…Ti mas kahuluya pa gid na ya.’”

Mabug-at suno sa iya ang head dress kag halog. 21 kilos ang kabug-aton sang costume nga ginrampa ni Rabiya, “Nagayuhom lang to kaina si Rabiya pero ang agunto niya to—napilasan pa ang iya nga kamot,” pahayag ni Piamonte.

Ginpanugyanan man niya nga indi gid dapat magpa-distract ang Ilongga beauty queen samtang nagahilapit ang Miss Universe finals.

Ginpasiguro niya nga handa na gid si Rabiya kag ilabe nga ginapreparahan ang Question and Answer portion. — via Aksyon Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply