WVMC-SNL, wala sang kapasidad sa pag-conduct sang genome sequencing pero may makina nga mahimo maka-initial screening

ILOILO CITY — Wala sang kapasidad ang Western Visayas Medical Center Sub National Laboratory (WVMC-SNL) sa pag-conduct sang genome sequencing pero may makina nga mahimo maka-initial screening.

Ini ang pahayag ni Dr. Stephanie Abello, chief sang WVMC-SNL, kasunod nga nag-request si Iloilo City Mayor Jerry Treñas sa Department of Health nga i-capacitate ang laboratory nga makahimo sang genome sequencing.

Suno kay Dr. Abello, kinahanglan sang separado nga pasilidad para sa genome sequencing, dugang nga mga gamit kag apparatus, kag mga personnel.

Paagi sa genome sequencing, mahibaluan ang variant sang COVID-19 nga naka-infect sa isa ka COVID-19 patient. Sa subong, wala sang available nga pasilidad ang WVMC-SNL para sa genome sequencing.

Sa tanan naman nga mga Sub National Laboratories sa Pilipinas, lima lang ang may ikasarang sa pag-conduct sang screening bilang inisyal nga proseso sa genome sequencing kag lakip na diri ang WVMC-SNL.

Posible suno kay Abello, nga ginatun-an pa sang DOH kag RITM kun iduso man ang pag-conduct sang genome sequencing sa mga SNLs ukon initial screening lang sa mga may ikasarang.

Ginpahayag naman kay Dr. Noel Ferriols, director sang Philippine Genome Center Visayas, mahimo sila maka-conduct sang capillary testing kag ini ang kabahin sang bilog nga genome sequencing.

Sa kinahanglanon nga makina, ginpahayag niya nga tubtob sa P30-Million na ang kinahanglan. Dugang diri, may mga dugang pa nga mga makina, apparatus, kag personnel man nga kinahanglan.

Ginaduso ang pag-conduct man sang genome sequencing sa PGC Visayas kag PCG Mindanao apang laban nga ma-realisar ini sa masunod pa nga tuig, suno kay Dr. Ferriols.Sa subong, ang PGC sa Diliman lang ang may ikasarang sa pag-conduct sang genome sequencing. — via Aksyon PM Reports