STA. BARBARA, ILOILO – Napilasan sa tuo nga parte sang iya lawas ang 41-anyos nga lalaki nga may nervous breakdown sa isa ka barangay sa Sta. Barbara sang natiruhan sang pulis.

Suno kay PSSg John Sabio, imbestigador sang Sta. Barbara MPS, nagtuyo magpanglabo ang lalaki sang ginpakalma sang mga otoridad. Antes sini, nagpangayo sang bulig ang pamilya sang lalaki sa mga pulis agud nga mapakalma siya mga las 4:50 kahapon sang hapon, Hunyo 7.

Upod ni Sabio nga una nga nagresponder ang ila team leader, apang wala nagpamati ang lalaki kabangdanan nga nagtawag pa gid sila sang dugang nga upod kag sang SWAT team.

Nagresponder man si PMAJ Raymond Celoso, hepe sang Sta. Barbara MPS.

Halos apat ka oras ang pagnegosyar sang mga pulis sa lalaki agud nga magkalma bangud may gina-uyatan siya nga binangon kag kutsilyo. Ginpalapitan ni Celoso ang lalaki agud nga istoryahon, apang ginlabo siya sang binangon. Nasagang sang hepe sang iya ginabitbit nga kawayan ang binangon.

Tuyo pa kuntani nga lab-on liwat sang lalaki si Celoso kabangdanan nga gintiro na lang siya sang isa ka pulis nga nagresponder.

‘NAHANGPAN SANG PAMILYA’

Ginpabutyag naman sang utod sang lalaki nga nahangpan nila ang gin-obra sang pulis.

Antes nagtawag sang mga pulis, plano kuntani sang pamilya nga dal-on sa ospital ang lalaki apang indi nila ma-control.

Ginkumpirmar sang pamilya nga napatay samtang ginabulong sa ospital ang lalaki. –via Angel Mae Ciudad