Restrictions sa Guimaras, matawhay nga napatuman sa una nga adlaw sang implementasyon –Gov. Gumarin
JORDAN, Guimaras – Matawhay nga napatuman ang Executive Order No. 24 ni Guimaras Governor Samuel Gumarin nga nagapatuman sang border restrictions sa probinsiya sugod kahapon, Hunyo 7.
Suno kay Gumarin, istrikto gid nga gina-check sa mga border control points ang travel pass sang mga residente agud masiguro nga essential ang ila pagbyahe.
Apektado sa ginapatuman nga restrictions sa probinsiya ang mga naga-trabaho sa Iloilo City bangud ginapasugtan lang ang operasyon sang sea vessels halin sa las-6 sa aga tubtob las-tres sa hapon.
Ginpahayag ni Gumarin “Sa sini nga bahin, indi exempted ang aton nga mga naga-ubra sa Iloilo yet may ginhatag kita [nga] ligwa –hatagan naton sila sang pass…[sa] matag-adlaw pwede sila makapa-Iloilo kay isa ini sa aton nga exemptions. Naga-apelar lang kami bilang Guimarasnon nga sundon naton ini kay waay na kita sang iban nga pamaagi kay waay pa kita [bastante nga bakuna]… pila pa lang ka porsyento ang aton vaccination program. Madugay pa ni… As of now amo pa lang ni ang aton mapatigayon [agud] mapa-stop naton ang COVID-19 infection sa probinsiya sang Guimaras.”
May pilian naman suno sa iya ang mga residente nga naga-trabaha sa Iloilo, “Naga-apelar kita sa mga nagatrabaho dira sa Iloilo kag sa ila employer nga intindihon gid anay ang mga taga-Guimaras. Ang isa ka option is matiner dira siya anay sa Iloilo ukon mapuli sila diri kag mangayu lang anay dispensa nga earlier—dapat sila maghimos kag magpuli before mag-untat ang aton nga sea transport. Kun hatagan naton tsansa ang iban – ang iban indi…mabulubdlay ni. This is uniform sa tanan-tanan…naga-antos ang tanan.”
Ginapanindugan ni Gumarin nga katuyuan sang lihok nila nga mapunggan ang pagdamo sang kaso sang COVID-19, “Nagtaas ang aton positivity rate. Buot silingon ang positivity rate naton sang una –more kita sa asymptomatic. Subong ang symptomatic naton si more kag ang death naton daw medyo gintunga niya gid –just for a period sang two to three weeks. Nagsaka ang aton nga kaso diri sa probinsiya sang Guimaras halin sang duha ka semana na ang nakaligad nga sa diin daw medyo mabudlay gid. Kag ang pinakamabudlay na diri is sa nasiling ko na, kun ngaa ginpatuman naton ini – almost 95% sang amon nga mga kaso indi naghalin sa Iloilo kundi locally transmitted.”
Sang nagligad nga tuig suno sa iya, daku ang nabulig sa pag-upang sa paglapta sang COVID-19 ang pagpalip-ut sang business hours sa probinsiya.
Gina-assess suno sa iya ang restrictions nga ginapatuman kun nakabulig gid man agud panubo ang kaso kag para mahibaluan nila kun may adjustments nga himuon. Subong nga Hunyo, napaidalom sa Modified General Community Quarantine (MGCQ) ang Guimaras. –via Firingline