Iloilo City–Naghiwat sang Blessing kag Inauguration sang new Alta Tierra Village Substation ang BFP-Iloilo City kadungan sang activation sang Emergency Medical Services kag Fire Motorcycle Unit subong nga adlaw, Hunyo 10.

Sa impormasyon sang Aksyon Radyo Iloilo halin sa concerned citizen, may-catering services pa sa natungdan nga event.

Makita sa mga pictures nga ginpadala sa Aksyon Radyo Iloilo, nga nagtambong man sa event si Iloilo City Lone District Congresswoman Julienne ‘Jam-Jam’ Baronda.Base sa EO 50-A ni Mayor Jerry Treñas, ginadumilian ang paghiwat sang anuman nga mass gathering event sa syudad, tubtob Hunyo 15.

Sang nagligad, nagpahayag na si Mayor Treñas nga magkaon nga naga-isahanon bisan sa family setting bangud sa padayon nga pagtaas sang kaso sang COVID-19 sa syudad sang Iloilo.

‘LAPSES KO NA’

Gin-ako ni Bureau of Fire Protection (BFP) 6 Director Jerry Candido ang kapaltahan sa ginhiwat nga blessing kag inauguration sang bag-o nga substation sang BFP-Iloilo City sa Alta Tierra Village, Jaro kaina sang aga.

Suno sa iya, handa si Candido nga atubangon anuman ang mangin penalidad sa natabo.Gin-ako niya nga imbitado siya sa amo nga kahiwatan kag pila ka opisyal sang BFP subong man si Iloilo City Lone District Representative Julienne Baronda.

Ginpahayag ni Candido nga una nga na-postpone ang event sang Hunyo 4 gani ila gin-schedule subong nga adlaw kag istrikto nila nga ginsunod ang 30 percent capacity pagtitilipon.

Gin-ako man niya nga wala siya nakakita kag nakabasa sang kopya sang EO number 50-A ni Iloilo City Mayor Jerry Treñas nga ginadumilian ang mass gathering samtang yara sa modified enhanced community quarantine ang siyudad.

Pero indi ini excuse suno sa iya sa iya kapaltahan.

Gin-athag man niya nga wala nadayon ang lunch sa event bisan pa nga nagpa-catering sila bangud naghambal siya nga i-limit ang time sa pagtililipon.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply