ILOILO CITY – Masakit sa dughan kag ilong ang baho nga nagahalin sa Gegato-Abecia Funeral Homes & Crematory, Inc sa Brgy. Balabago, Jaro.

Suno ini kay Rene Joseph Besana, isa sa mga residente nga nagareklamo.

Nagsugod suno sa iya sang nagligad nga tuig ang indi maayo nga baho, sang nagsugod man ang COVID-19 pandemic. Posible suno kay Besana nga nagahalin ang baho sa crematorium.

Gin-athag ni Besana nga bisan madugay na nga naga-operate ang crematorium, sang nagligad lang nga tuig nagsugod ang pag-usbong sang indi maagwantahan nga baho nga iya ginlaragway nga “daw hilo nga ginaluto.”

Masami suno sa iya nga nagapuog ang aso kun udto.

Kun mapanimahuan niya, ginpahayag ni Besana nga, “napung-utan ko sir. Daw gapin-ot ang pagginhawa tapos daw ka lamig sang sulok-sulok, daw gapanalupsop gid.”

Sa pagpakig-angut sang Aksyon Radyo Iloilo News Team kay Punong Barangay Edgar Arañador, ginpabutyag niya nga nagpasalig ang tagdumalahan sang Gegato-Abecia nga maabot sa Hulyo 15 ang ila bag-o nga machine nga indi magtuga sang aso sa chimney. Sa subong, may ginakay-o sa chimney sang crematorium. –via Aksyon Hotline